APL është një ëndërr e parë nga profesionistët që besojnë ende në dinjitet, integritet, punë. Bëhu pjesë e kësaj ëndrre që na përket të gjithëve, pasi të gjithë bashkë mund të arrijmë atë që sot individualisht na duket si e pamundur!

Të jesh pjesë e APL-së, është mundësi për të ndarë eksperienca profesionale, për të pasur vizibilitet, dhe mbi të gjitha për tu faktorizuar në mbrojtje të konkurrencës dhe taksimit të ndershëm. Ashtu si yjet e Sportit, edhe Ekspertët Freelance shkëlqejnë më shumë në Ekip. Përtej një CV-je ekselente të arritur me shumë mund, orientimi në tregun e punës shumë kompleks bëhet më i favorshëm duke bashkëpunuar si të barabartë midis të barabartëve.

Për APL uroj shumë sukses dhe arritje në mbrojtje të të drejtave të profesioneve të lira dhe, si një nga nismëtarët e “betejës” për rrëzimin e parashikimeve ligjore për tatimin mbi të ardhurat mbi profesionistët e lirë që u fitua në Gjykatën Kushtetuese në qershor 2024, ju citoj një mesazh që ka brenda çelësin e suksesit për çdo lloj grupimi: “Nuk ka rëndësi se sa një njeri mund të bëjë, nuk ka rëndësi se sa gjithëpërfshirës mund të jetë personaliteti i tij, ai nuk do të bëjë shumë sukses në biznes në rast se nuk do të jetë në gjendje të punojë me të tjerët” (John Craig).

Përfshirja ime në Aleancën e Profesionistëve të Lirë erdhi si një vendim natyral, për të qenë pjesë e një rrjeti të gjerë njerëzish që ndajnë të njëjtat vlera dhe sfida. Ajo është një mundësi për të rritur dhe forcuar, pozitën e profesionistëve të lirë në shoqëri dhe për të përmirësuar cilësinë e jetës sonë profesionale.

Kjo Aleancë n'a ofron një platformë për të ngritur zërin, për të bërë kërkesa të drejta dhe për të luftuar për të drejtat tona.